12:39 ص
Unknown
مقهى بلدى مزدحم بالزبائن من مختلف
الأعمار والمهن والثقافات , لا أحد يلتفت إلى التليفزيون والكل منهمك فى أحاديث
جانبية وسط أنفاس الشيشة البريئة والغير بريئة سواء داخل المقهى أو على الرصيف
المحتل ومعه عدة أمتار من تحته وفجاة صاح صاحب المقهى فى فرحة طاغية
صاحب المقهى : يانور النبى , يا
إخواننا , القرض طلع حلال .
زبون : بيتقول إيه
يامعلم ؟
صاحب المقهى : بقولك القرض طلع
حلال , مفتى الإخوان أعلنها النهاردة .
زبون آخر : اللهم صل على
النبى . حلال بجد .
صاحب المقهى : والله حلال .
حلال .
إنتبه بقية الرواد إلى الصيحات
التى ملأت أرجاء المقهى
واحد : صحيح الكلام
ده , القرض طلع حلال ؟
إتنين : المعلم
بيقولك إنه سمع الخير .
تلاته : يعنى نطمن
كده , الحمد لله .
أربعة : أما الناس
المغرضين دول ظلمة . ماهو الرئيس قالها إمبارح فى الخطبة .
خمسة : عايزين يشوهوا
الإخوان ويقولوا القرض ربا وحرام .
ستة : منهم لله
الكفرة . الريس قالها أنا مش ممكن أأكل الشعب من الربا .
سبعة : أظن بعد
الفتوى دى مفيش كلام تانى .
صاحب المقهى : كلام إيه , حد
يجرؤ يتكلم , ياوله ياحلال , الواحد إتلخبط , ياوله ياهلال .
هلال : أوامرك
يامعلمى .
صاحب المقهى : طلبات الزباين
إندفعت خلاص , وتنزل حاحة ساقعة على حسابى للكل .
هلال : وده ليه
يامعلم ؟
صاحب المقهى : إنت مش معانا
ياوله , القرض طلع حلال .
هلال : وربنا يامعلمى
.
صاحب المقهى : وربنا طلع حلال .
إسمع خليها شربات بدل الحاجة الساقعة . رايح فين ياوله ؟
هلال : أبشر الناس
يامعلمى .
يخرج إلى رصيف المقهى ويصيح فى الجميع حتى المارة فى الشارع
هلال : القرض طلع
حلال ياجماعة , القرض طلع حلال .
هاص الشارع وزاط وتوقف الناس للإستفسار والسعادة تملأ وجوههم
زبون : إلحق يامعلم
, الوله هلال وقف الشارع على رجل .
صاحب المقهى : وماله , خلينا
نفرح شويه .
زبون : أحسن يقولوا
بنقطع الطريق .
صاحب المقهى : مين يستجرى ,
وبعدين لما نقطع الطريق شوية حايجرى إيه ؟
أصوات كلاكسات السيارات ملأت أرجاء المكان لتوقف الطريق وهلال يدور عليهم
بالشربات
هلال : إشرب ياباشا
, إشربى ياهانم , القرض طلع حلال .
الأولاد تجمعوا أمام المقهى يرقصون ويغنون
الأولاد : القرض طلع
حلال , حلال طلع القرض .
هلال : سمعينا
زغروطة ياأم صابر , القرض طلع حلال .
أم صابر : جد ياوله ياهلال , يا ألف نهار مبروك .
أم صابر تطلق زغرودة عالية تتبعها زغاريد أخرى بالتتابع وتفتح نوافذ
وبلكونات
جارة : خير يا أم
صابر .
أم صابر : خير ياختى ,
مش القرض طلع حلال .
الجارة : صلاة النبى
أحسن , ألف مبروك .
تتناقل الأخبار بين الجارات والزغاريد تملأ أرجاء المكان وفى داخل المقهى علا
صوت التليفزيون الذى كان يذيع أوبريت الليلة الكبيرة
الصوت : يا ولاد
الحلال , بت تايهه طول كده , رجلها الشمال فيه خلخال زى ده
زحمة ياولداة , كام عيل تاه
الليلة الكبيرة ياعم والعالم كتيرة ماليين
الشوارع يابا .............
قطع
Posted in: دردشة
0 التعليقات:
إرسال تعليق